Friday, June 15, 2007

أعقلوا أحسن و الله العظيم أعمل نيو لوك




أستكمالا للي بيحصل في اسكندرية


و في أوائل العشرينات من القرن الماضي كتب عمنا بديع خيري و غنا عمنا سيد درويش


إن كنت صحيح عايز تخدم

مصر أم الدنيا و تتقدم

لا تقول نصراني و لا مسلم

و لا يهودي يا شيخ اتعلم

اللي أوطانهم تجمعهم

عمر الأديان ما تفرقهم


الله يرحمك يا عم بديع و يا عم الشيخ سيد, و قسما عظما يا مصريين إذا ما عقلتوا لأعمل نيو لوك عشان لا حد يعرفني و لا أعرف حد


الفاجومي

Thursday, June 14, 2007

تعليقا على اللي حصل في اسكندرية بين المسلمين و الأقباط



تعليقا على الأحداث اللي بتحصل في اسكندرية دلوقتي بين المسلمين و الأقباط ... قال عمنا بيرم في قديم الزمان


من عهد م القرآن هبط

نزل هنا عمرو و ربط

بينا وبينكم يا قبط

عقود وداد متسجلة

قرآن محمد قالنا

عيسى المسيح روح ربنا

و الست مريم ستنا

تنزل في أعظم منزلة


و لسه بردوه يا مصريين ما فهمتوش؟! أنا حزين للي بيحصل في كل مكان في مصر المحروسة بينا - بين المسلمين - و أشقائهم المسيحيين

فوقوا بقى أحسن و دين النبي أنتحر و يبقى ذنبي في رقبة سبعين مليون مصري و كسور

الفـــاجــــومــــي

Sunday, June 10, 2007

تحية فاجوماتية من أسكندرية



أبو النجوم يرسل بتحية

فاجوماتية

إلى كل المدوناتية

من أسكندرية


حيث درجة الحرارة عال العال


و بيفكركم بالقصيدة دي


اسكندرية

يا اسكندريه
بحرك عجايب
ياريت ينوبني م الحب نايب
تحدفني موجه
على صدر موجه
والبحرهوجه
والصيد مطايب
أغسل هدومي
وأنشر همومي
على شمسه طالعه
وأنا فيها دايب
كأني فلاح في جيش عرابي
مات ع الطوابي
وراح في بحرك
كأني نسمه فوق الروابي
م البحر جايه
تغرق في سحرك
كأني كلمه من عقل بيرم
كأني غنوه من قلب سيد
كأني جوا المظاهره طالب
هتف باسمك
ومات معيد
كأني صوت النديم
في ليلك
بيصحي ناسك
يشدوا حيلك
كأني طوبه من بيت في حاره
كأني دمعه
في عيون سهارى
كأني نجمه فوق الفناره
تهدي الحيارى
والبدر غايب
يا اسكندريه
يامصراويه
على سن باسم
على ضحكه هاله
البحر
شباك ومشربيه
وانتي الاميره
ع الدنيا طاله
يا اسكندريه عاشق
وبدوي
ارتاح في حضنك
والود ودي
يكون كلامي
عربون غرامي
وبالمحبه
ناخد وندي
يا اسكندريه فيكي الغلابه
ع الرزق يسعوا ولايناموش
صبح صباحهم
رجع مساهم
وزاد شقاهم
ومارتاحوش
يا عيني ع اللي الزمان تعبهم
وضاع تعبهم
ومالتقوش
نزل شبكهم
في بحر طامي
طلع شبكهم
على فاشوش
وفيكي بين البشر
ديابه
وفيكي فوق البشر
وحوش
وفيكي ناس مغرمين صبابه
لو خان زمانهم
مابيخونوش
وفيكي خمري
سلمت امري
ما اقدرش اشوفه
وما انيلوش
سمك يا بني يا اسكندراني
في العشق واحد
مالكش تاني
سمك يابني يا اسكندراني
في الحسن ساحر ومعجباني
سمك يابني
والعشـق غيه
تبدأ بنظره
تبقى ملاغيه
وكل عاشق وله بهيه
وكل شاعر وله اغاني
وأنا اللي عشق الصبايا كاري
أعشق وأغني ما اقدرش اداري
واي نظره بتجيب قراري
وايشحال عيونك
يا الاسمراني


Wednesday, June 6, 2007

الحمد لله .. كلمات النكسة




الحمد لله خبطنا
تحت بطاطنا
يا محلا رجعه ظباطنا
من خط النار
يا اهل مصر المحميه
بالحراميه
الفول كتير والطعميه
والبر عمار
والعيشه معدن واهي ماشيه
اخر اشيا
مادام جنابه والحاشيه
بكروش وكتار
ح تقول لى سينا وما سينا شي
ما تدوشناشي
ما ستميت اوتوبيس ماشى
شاحنين انفار
ايه يعني لما يموت مليون
او كل الكون
العمر اصلا مش مضمون
والناس اعمار
الحمدلله وأهي
ظاطت
والبيه حاطط
في كل حته
مدير ظابط
وإن شالله
حمار
ايه يعني فى العقبه جرينا
ولا ف سينا
هى الهزيمه تنسينا
اننا احرار
ايه يعني شعب ف ليل ذلة
ضايع كله
دا كفاية بس اما تقول له
احنا الثوار
الحمد الله ولا حولا
مصر الدوله
غرقانة فى الكدب علاوله
والشعب احتار
وكفايه اسيادنا البعدا
عايشين سعدا
بفضل ناس تملا المعده
وتقول اشعار
اشعار تمجد وتماين
حتى الخاين
وان شا الله يخربها مداين
عبد الجبار

Sunday, June 3, 2007

و أدي كمان بوست عشان الحبايب




أنا سعيد بالعيال اللي ردوا عليا كلهم, و حسيت إني كده متونس, لكن متورط و إن كنت يا ابن والدي منتظر مني أكلمك كل يوم تبقى بتحلم! لكن كل ما اقدر حنتكلم سوا مع بعض, أنا اقدر أقولكم حواديت مصرية .. أنا عشت الحواديت دي و شوفتها بعنيه .. شوفت المصريين و شوفت مصر .. و هي حتى تحت الاحتلال الانجليزي كانوا أشقائنا العرب مسمينها أم الدنيا و كانت فعلا أم الدنيا , كانت أم الفن العربي و أم الموسيقى العربية و أم المسرح العربي و أم السينما العربية

و مصر دي الخديوي إسماعيل خلاها تاني دولة في العالم تدخلها السكة الحديد بعد انجلترا و تاني دولة يدخلها كرة القدم بعد انجلترا و التلغراف و البوسطة استخدمت من زمان, الخديوي إسماعيل باشا .. أفندينا كان عنده مشروع الدكتور محمود قاسم أيام الانتفاضة الطلابية لما شتمت الخديوي إسماعيل قالي ليه أنا بحبك و قام حاكي لي الحكاية دي قالي أنا أبويا كان في الدفعة الأولي من البعثات اللي بعتها أفندينا أوروبا لبناء الثقافة الحديثة و كل يوم الساعة 8 أفندينا بجلالة قدره كان بينزل يقابلهم في الفندق واحد و احد , ما اتصورش دلوقتي إن ده ممكن يحصل أو إن حد عنده مشروع دلوقتي

قالوا يا جحا بيت أبوك بيقع قال أما الحق أخد لي طوبة. كام مصري دلوقتي بيشتغلوا بالمنطق ده؟ اللي بيطول حاجة بيخطفها و اللي بيخطفوا كتير قوي و يهربوا كمان, و إحنا لسه بنلاقي العيش, هي دي مصر. شوفوا صلاح جاهين "بحبها و هي مالكة الأرض شرق و غرب و أحبها و هي مرمية جريحة حرب" احنا دلوقتي مرمية جريحة حرب مصر دلوقتي مرمية جريحة حرب الله يرحمك يا صلاح ..

احنا بنقول الكلام ده ليه, تعالوا نتكلم بشجاعة و أكيد حنوصل لحل لأننا أصحاب البلد دي, الحكومة حكومة الحزب الوطني كانت متعاقدة على بيع 120 ألف مرة مصرية للسعودية و اللي كان مشرف على ده وزيرة الشئون الاجتماعية فيه إهانة اكتر من كده إيه؟ و بعدين باعوا البلد حته حته أخر صفقة بتاعت الإمارات باعو ارض العاصمة عشان يعملوا مجمع صناعي

العاصمة دي هي اللي انخبل بيها السلطان سليم الأول اللي قال "هذا الجمال يليق بعاصمة" و لذلك سرقوا كل التحف و بعض المعمار من مصر نقلوه للأستانة و خدوا الصنايعية المصريين اللي عملوا القاهرة المملوكية و جيه إسماعيل باشا عمل القاهرة و الأوبرا هنا و زي ما قولتلكم نقل مصر نقلة نوعية بعد ما محمد علي عمل القناطر, أنا سألت مهندس ري و قالي القناطر دي تعتبر اكبر مشروع في القرن التاسع عشر و أنها طفرة نوعية في الزراعة مش ده كان في مصر و لا فين هو أنا بحبها من شوية؟ كل ما امشي اتكعبل في بستان ما احبهاش ليه بقى؟ علشان أنضحك علينا شوية و نعسنا شوية خلاص حنيأس, طيب لو راح الجيل ده حيصحى اللي بعده .. أيه رأيكوا بقى؟ البلد دي ماشية ع الحال ده من سنين و اللي يحترم نفسه بيستني في قلوب الناس, اختر لي مثلا عشر حكام لمصر هل كلهم كده على بعض يساوا سيد درويش؟ هل ممكن مثلا يطلعوا قد حذاء بيرم؟ و شوف بقى بيرم هذا العاشق لنا معه عودة (حلوة دي ههههههه كنا بنقول في ايه بقى) ما هو احنا لو قلنا دلوقت الاخوة دول لو اتكلوا على الله ان شاء الله عن قريب, هتقولي مين هيجي بعدهم, طيب ما نت لو كنت وقفت سنة 1952 و قولت مين بعد الملك ما كانش جم اللي جم و لا حصل ده كله.

و عموما يا ولاد أنا عايز أقولكم إن الحياة منحة جميلة, الحياة منحة بديعة و سخية جدا بس اللي يعرف قيمتها ياخد منها, و أنا متشكر إني أتخلقت, و متشكر جدا إني أتخلقت إنسان مش دودة و لا تعبان و لا جرثومة ما لهاش لازمة. و عشان كده بحب الورد و بحب فيروز و بحب أشوف الشباب المصحصح مالي الشوارع و السكك في مصر المحروسة

و يا محني ديل العصفورة .... شوفوا هتبقى مين بقى هيا المنصورة؟

و بس كده كلتوا دماغي
و يلا يا اخويا أنت و هو كل واحد على مُكنته و اشتغلوا
تتمسوا بالخير و نشوفكم أمس بس خلاص