Friday, June 15, 2007

أعقلوا أحسن و الله العظيم أعمل نيو لوك




أستكمالا للي بيحصل في اسكندرية


و في أوائل العشرينات من القرن الماضي كتب عمنا بديع خيري و غنا عمنا سيد درويش


إن كنت صحيح عايز تخدم

مصر أم الدنيا و تتقدم

لا تقول نصراني و لا مسلم

و لا يهودي يا شيخ اتعلم

اللي أوطانهم تجمعهم

عمر الأديان ما تفرقهم


الله يرحمك يا عم بديع و يا عم الشيخ سيد, و قسما عظما يا مصريين إذا ما عقلتوا لأعمل نيو لوك عشان لا حد يعرفني و لا أعرف حد


الفاجومي

86 comments:

مُرَاقِبْ مِصْرِي said...

بتقول لمين وتحكي لمين يا عم أحمد يا جميل... عشان بس تعرف الفرق بين عشرينات القرن الماضي والنهاردة... بديع خيري كان ينفع يتكلم عن حرية الاعتقاد والدين وحق المواطنة مش بس للمسيحي لكن لليهودي كمان... كام واحد في مصر النهاردة يجرؤ يفكر مش يكتب عن حقوق اليهود في مصر... أما المسيحيين فيحمدوا ربنا إنهم عايشين أساسا وكفاية عليهم تلت ثروة البلد - كما حرضت ضدهم الحكومة على لسان الولية الأرشانة عيشة عبهادي - وبين الحين والآخر يطلع المسلمين يعلموهم الأدب وتسمع شوية سخام من نوعية عباد الصليب الكفار... والقرف والوساخة شغالة ومكملة

أنا رأيي يا ابو النجوم تروح تعمل النيو لوك من دلوقت بس برضو هنعرفك وهتعرفنا

Anonymous said...

و الله لو عملت إيه، برضه هنعرفك. هيهيهي بس الفكرة في حد ذاتها حلوة قوي برضه

اللي مش هيعقلوا النهاردة بكرة السيفون يزقهم على تحت مع الزبالة. التاريخ علمهالنا قبل كده مرات.. و اللي بيرفضوا يتعلموا، بينقرضوا ببساطة شديدة

عماد حبيب said...

أخشى أن أقول أنهم يقتلون بيرم

أو كما قال نجيب سرور هذا عصر اللصوص

و ليس عصر بيرم و سرور و لا للأسف عصر نجم

انتحر يا فاجومي أو غير شكلك أو قدم إستقالتك أيها الشيوعي الجميل
سنبقى نحبك
و نلعن عجزنا


فاكر لما مرة قلت إن فيه مؤامرة لإفساد ذوق الناس

هي نفسها المؤامرة الي قتلت الفن و المواطنة و الدولة المدنية نفسها

بيسموها صحوة


هوس ديني و وهابية و بلى أزرق

فاكر حد هيفهمك
!!!
بالكثير هيقول لك الإنتحار حرام

Anonymous said...

الفاجومى ، نوارة :

http://www.dailymotion.com/video/x1icwu_20070321003

http://mads.jeeran.com/archive/2007/3/181586.html

الأغاني للرأفتاني said...

يا رب ما يعقلوا يا استاذى الفاضل علشان نفسى اشوف النيولوك ده هيكون شكله ايه

Bou-ME said...

أبناء مصر...
بنحب...هنقدر..هنغير...
http://abna2masr.blogspot.com/

ibn nasser - ابن ناصر said...

هههه والله يا عم احمد انيولوك يبقي جامد لكن احنا بنحبك ولو عملت ايه
هنفضل نحبك

تحياتي

Anonymous said...

مش ملاحظين ان الموضوع اساسا كان لعب عيال,مالنا بقينا مستنيين لبعض اقل هفوة عشن نولع البلد كده ليه؟

ما علينا said...

لو انت شايف النيولوك هو الحل جرب
مش هاتخسر حاجة

وخلاص
اليهود والمسيحيين بقوا هم المظلومين في البلد

والمسلمين بقى طايحين يعني وما حدش عارف يلمهم
حسبي الله ونعم الوكيل

إبـراهيم ... said...

عم نجم ، أنا بس ف الأول سعيد جد(ن) بوجودك بيننا ،،،، و سعيد إني بشوفـك ف ميريت ،،، وأنك موجود بيننا ........


أنت الباقي ..........

ربنا يخليك لينـــا !

.:.-=- ELGaZaLy-=-.:. said...

إن كنت صحيح عايز تخدم
مصر أم الدنيا و تتقدم
لا تقول نصراني و لا مسلم
و لا يهودي يا شيخ اتعلم
اللي أوطانهم تجمعهم
عمر الأديان ما تفرقهم
---------------------------

انا شايف يا عم احمد ان العيب فى المتعصبين من الجمبين بجد ايوة من الجمبين المسيحين عندهم متعصبين وكتير برضة

ربنا يسهل ويفوقو بقى لان الموضوع بقى مقرف اوى بس حلوة فكرة النيو لوك يا عمنا

الجعرّ و أبورمّانة said...

الغريب ياعم احمد ان الناس دول من مية سنة واكتر عندهم الفكر العالى ده .. واحنا النهاردة بقينا بالعصبية والطائفية دى .. شوف العراق ولبنان وفلسطين
حاجة بقت تسد النفس

Anonymous said...

لو كله مشكله حلها يكون عمل نيولوك كان زامنا اكتر ناس بتعمل نيولوك
كنت عملت كل يوم واحد عشان احل مشاكل كتيير
احنا بنضحك لكنه موضوع ما يضحكش
بس ياريت ياعم احمد تكتبلنا الوصفه بتاعت النيولوك

-_- said...

بحبك يا نجم
و بحب اللى بتحبهم
عشان انت عمنا كلنا

اوعى تعمل نيو لوك .. ده انت الاصيل اللى فيهم يا عم نجم

Anonymous said...

خايف مصر في يوم من الأيام تبقى زي العراق
إسمعوا الشيوخ اللي شرايطهم بتتباع على الإرصفة

The Alien said...

نيو لوك
أنا مع النيو لوك
كلنا هنعمل نيو لوك
وبرضه مفيش حاجة هتنفع

تحياتي

ابن رشد said...

اصرخ و النبي يا عم نجم و قلهم

شيماء الجيزى said...

يا عمنا الحبيب
يالى بنموت فى كلامك وبنحس انه بيصرخ بأسمنا

شوفت تعليق عندك عجبنى اوى
وحابه اسرقه لو تسمع ويسمح صاحبه
او مش هسرقه يعنى
بس هتفق معاه
كنا زمان يا عمنا نفسنا عاليه اوى
والزوق والحب والانسانيه والكرامه كانت حاجات مهمه خالص
واساسيه
كان المسيحى والمسلم بيتعاملوا مع بعض بزوق وادب
واحترام
دلوأت
آه من دلوأت
والله نفسى يسمعوا الكلام ده
الكلام بتاع عمنا ده الصح يا ناس
لازم نعقل
لازم نفهم ونعرف ان الى بيحصل ده الغلط
واننا اخوات واحباب

ومش بالنيو لوك يا عمنا
مش بيه خالص
سلاماتى يا عم الشباب

Amr Omar said...

عمنا نجم النجوم

أنت عارف ان اللي بيحصل ده مقصود و في أوقات معينة ... أنتخابات الشورى محتاجة حاجة تغطي على بلاويها ... ما فيش مانع من شوية دم يطرطشوا هنا أو هناك ... الناس خاص ما بقاش ليها ثمن

فوكيره said...

انا اتعلمت احب كلامك من ابويا الله يرحمه

لقيت اشعارك في دفاتره القديمه

وانا بفتش وبدعبس فيهاا
في حياته وبعد مماته

كان كل ما يشوف طلتك على التلفزيوون يوقف
ويعلى على الاخر



سمعت عنك كلام كتيير منه حلو ومنه مش قد كده

انا معرفش الحقيقه من جوه ايه ومينفعش احكم باحساسي
او احكم بكلام سمعته
من غير ما اقرأ واعرف كل سطر كتبته


بس الى انا عرفاه ومتأكده منه بقلبي وبعقلي مع بعض

انك انت راجــل بتحب البلد دي
لا بتحب ايه

ده انت بتعشق ترابها

وده الى يهمنى
وعلشان كده بحب كلامك وبساطته

فرحانه اووى بان جيل الكبار حد منهم اتطوع وشجعنا
جه هنا على عالمنا الانترنتي
وقالنا انا بثق فيكوا يا ولاد
وبحبكواا و انتو الامل

ربنا يخليلنا الامل وميحرمناش من حنان مصر ومن وجودنا مع بعض مسلم ومسيحى


يا عمنا

غريبه فى وطنى said...

مش عرفه بجد اقول ايه...!! كل اللى عاوزه اقوله انى بحبك جداا زى كل المصريين .. لانك الوحيد اللى مدينيا امل فى بكره و ان احنا لسا لينا وطن و مش غرباء فى اوطنا( لكن حتى يتغير الوضع الراهن ساظل غريبه فى وطنى)..ربنا يديلك الصحة والصبرو يخليك لينا
يا عم الكل ....

أشرف جهاد said...

الله عليكي يامصر
عمنا أحمد نجم , أعتقد أن شعرك الذي لا خلاف عليه ,
وأن طيبتك وسجيتك المعجونة بعشق مصر , تؤهل مدونتك لتكون أم المدونات , بالنسبة لمواضيع الفتنة , بس أسأل سؤال صغيور , مين الوحيد المستفيد من تفجر الفتنة كل فترة , وممارسات من التي تسفر عن هذه الاضطرابات القابلة للاحتواء , أنه النظام وهي لعبة الملهاة السياسية ,
وسلامي لجيفارا المصري , لأنه هو اللي وصلني لمدونتك

R.R said...

لاء بقى احنا عاوزين نعرف ايه النيو لوك
:)

Muslim&Quptia said...

ياعم احد يابو النجوم
احنا بدأنا نفقد الامل اصلا ان حال البلد دي ينصلح
علي رأي واحد صاحبنا اللهم احفظناكل اوراق اللعبةمبقتش ف ايدنا خلاص
لما تيجي تعمل نيولوك ابقي قولنا نعملو معاك والنبي
مسلم طهقان

Mahmoud said...

يا عم نجم ربنا يخليك ليينا يا مصبرنا و احلي قصيدة سمعتها هي بحبك يا مصر يا ابو النجوم سجلها بصوتك يا رييت يا حبيبنا

جار القمر said...

نيو لوك ايه ياعم فاجومي
ولا انتا كرسي في جهاز حكومي
آل كل ساعه ديكور يتغير
خلاص ياعالم حبيع هدومي

منورنا يا عم احمد وياريت كده تفضل تكتبلنا
معلش صوابعك حتوجعك شويه بس استحملنا بقا
تحياتي ليك...محمد علي جار القمر

micheal said...

يا ريت يكون فيه الاذن العاقله التي تعي و تغهم هذا الكلام بس عندي سؤال ممكن يكون بايخ حبتين...هو فيه ايه بيحصل بالضبط في اسكندريه اليومين اللي فاتوا
تحياتي و تقديري لعم الكل

ناردين said...

انت عملتها بجد ولا ايه؟؟؟؟؟
لأ مينفعش بقى كده بجد .. وحشتنا.. نهون عليك تغيب عننا كل دا ؟

mariam said...

حقيقى كلام جميل و عميق
لكن يا ريت يتنفذ
و يا ريت نفهمه فعلا

حقيقى سعادتى بوجود حضرتك معنا لا توصف

Anonymous said...

صباح الفل يا عمنا . . . بص انا مش عارف اقول لك ايه و لا ايه
اقولك حاجه؟ انا هحكيلك على جدتى - ربنا يديها الصحه - , جدتى اتعودت لما نكون قاعدين كده مع بعضنا فى ساعه صفا و يكون المزاج رايق تقعد تحكيلى عن زمان و ايام زمان
, لما كانوا ساكنين فى منطقه شعبيه كده فى اسكندريه اسمها " غيط العنب " و فى بيت ابسط من " مجلس قياده السطوح" بتاعك :)
وتقعد تحكيلى عن مفردات الشهامه و الجدعنه و الفتونه و حاجات غريبه كدهو عن اهل الحته اللى بيحاموا لبعض و يخافوا على بعض و عن الصيع و الحراميه و البلطجيه اللى كانوا عمرهم ما يئذوا ولاد حارتهم
فى مره و هىبتحكيلى , حصلت حاجه غريبه اوى , كانت مثلاُ لما تقوللى " و جدك بقى راح اتعارك مع فلان . . " اروح انا مقاطعها فوراُ " فلان ده مسيحى و لا مسلم؟؟ " كانت تتصدم شويه من السؤال و ترد يا تقول مسيحى يا تقول مسلم و بعدين تكمل " و لما راح بقى خد معاه عمك فلان " اروح مقاطعها تانى و اسأل السؤال التقليدى " و عمى فلان ده مسيحى و لا مسلم ؟ " تستغرب تانى و تسكت شويه و تجاوب و فضلنا عالحال ده لغايه ما جدتى فاض بيها و قالتلى بعصبيه كده " ايه يا واد حكايه مسيحى و لا مسلم دى؟ فارقه معاك اوى؟ "
المره دى بقى يا عم نجم انا اللى اتصدمت , لأنى ماكونتش واخد بالى من اللى بعمله و لما خدت بالى لقيتنى فعلا سألت السؤال ده يجى عشر مرات ! بعد كده لقيتها مش مشكلتى لوحدى دى مشكله جيــــل بحاله ! جيل بيحدد تعامله معاك حسب هويتك الدينيه ! " نعرفوا ملتك ايه الأول و بعدين نتكلم؟ " عشان كده لما جدتى بتقعد تحكيلى عن ان فلان ده اللى طلع مسيحى اتصدر لفلان ده اللى طلع مسلم ضد علان التانى ده اللى طلع مسيحى او عن فلان اللى طلع مسلم اتعارك مع فلان التانى اللى طلع مسلم و كان هيسيح دمه عشلن خاطر المقدس فلان ! لما بتقعد تحكيلى الحواديت دى بحس انها " شهرزاد" و ان دى قصص الف ليله و ليله , اساطير مالهاش صله بالواق
لكن يظهر فعلاً يا عمنا ان الواقع كان جميل فعلا و لا الحواديت !
اما واقع النهارده بقى انا حيران فيه , انا عن نفسى مش لاقى مشكله لأنى شايف اغلب الناس اللى بتعامل معاهم سواء مسيحيين او مسلمين معاندهمش تحديد العلاقه على اساس الهويه الدينيه و مسألأه الدين دى مش مطروحه خالص على دماغتنا بس لما بقعد عالنت و لا بفتح اى قناه عالتليفزيون بلاقى فيه كلام تانى خالص !
و اليوم اللى نزلت فيه كنيستى اللى جانب بيتنا و لقيتها غرقانه دم و الناس مرعوبه ! كان كلام تانى خلاص انا والله محتار , خايف نكون رايحين فى سكه اخرتها وحش و انا و فيه ملايين غيرى مالناش غيرها بلد ! ما عاناش باسبورتات و لو معانا مش عايزينها انا مش حسيب مصر ! و مش حسيب اسكندريه بالذات يا عم نجم ! انا بقى بقول الكلام ده كله ليه؟؟ والله ما انا عارف ! انا عايزك تقوللى حاجتين ! ايه اللى حصل و خللى الناس كده ! و ايه اللى لازم يحصل عشان الناس ترجع زى زمان؟
امانه عليك يا شيخ لاتقوللى و حياه مصر عندك و حياه **مصر الكنايس و مصر الجوامع** **مصر المزارع و مصر المصانع**
**و خان** **الخليلي** **و درب الغوازي و سيدنا الحسين
و حياه **مصر الموالد و شيلاه يا** **طاهره** **يا ست ام هاشم**
**يا جبر الخواطر**، **يا ماري يا جرجس ، يا سيدي** **ابراهيم**
**تناولوا اللي عايز ، و تشفوا السقيم**
_____________
سلام

ابو النجوم said...

ياعم احمد
الحكاية دى مش من النهاردة دى لعبة خبيثة دايما بيلعبوها ولاد الاية
فاكر سنة 19 ايام عمك سعد زغلول لما الانجليز حاولوا يلعبوا اللعبةدى وعلم مصر بقى فية الهلال والصليب وسعد باشا قال كلمتة المشهورة الدين للة والوطن للجميع .لكن اللى حصل بعدها جانا العساكر سنة52 وللاسف مافهموش الدرس قام ناصر بعد حادثة المنشية لامم الاخوان وبعدها قطر اسيوط والحاج صلاح نصر وبعدين جة ابو الانوار وعلشان يخلص من رجالة على صبرى وشعراوى جمعة يعنى الناس الحمر وانت كنت معاهم قام ابو الانوار اداهم الضوء الاخضر وبقى اسمة الريس المؤمن ودولة العلم والابمان لكن اخوانا البعدة ماعجبهومشى كدة وهات ياتفجيرات الراجل قرف منهم قال اجيب البابا شنودة يسندنى هو والجماعة بتوعة فى امريكا وكندا واخرتها لما مالقاش فايدة راح مقلوب على الاتنين ايام خريف الغضب زى ماقال اخونا هيكل
وابو علاء من ستعة مامسك الحكم وحكاية المسلم والمسيحى دى بتجيب لة حساسية والجماعة بتوع الامن عارفين كدة لما يحسوا انة هيغير فى الوزارة ولا ناوى يعمل حاجة يقوموا يشتغلوة من الايد اللى بيخاف منها لكن واللة ياعم احمد لا فية مشاكل بين المسلمبن والمسحيين ولا يحزنون ابعد الامن عنها وهى تعمر .الموضوع دة مايستحملش لعب العيال .مش يجيبوها العيال ويقعوا فيها الكبار .اصحى يانجم وصحى الناس وفهمهم الفولة.
وبعدين اية حكاية النيو لوك مانت عملت نيو لوك كام مرة قبل كدة وبقيت تتكلم فى الكورة والموضة والفن بتاع الهشك بشك البنت بنتك منزلة لك الفيدو بتاع روبى وفضحت بة الدنيا .بصراحة طالعة لابوها لسانها زالف ربنا يسترها معاها وانت بلاش تقعد وتفتح على الرابع قدامها البت هتودى نفسها فى ... ومهما كانت برضة دى بنت
ابقى اكلم كلامى بعدين وانت واحشنا الجديد بتاعك وكفاية تقليب فى الدفاتر
لك تحيات كل مصرى بيحب مصر
ابو النجوم

خيرالدين said...

مبروك دخولك عالم التدوين
انا عارف انها متأخره
مع انى مختلف مع حضرتك

هوندا said...

بجد كلام جميل اوى اوى لان الى عايز يعمل حاجة هيبطل يطلع القطط الفطسانه فى البلد بس عشان احنا فاضيين ومش بنعمل ولا عايزين نعمل حاجة بنجر فى شكل بعض :( ربنا يهدى

ابن رشد said...

فين قلمك يا عم احمد

truelove said...

ايه الجمال ده ياامد احمد بس انت تفتكر ان الناس هتاخد بالنصيحة دي

high_staff said...

احلى فاجومى تدوينى. تحىة خاصة من اهل
طنطا

احب اعرف حضرتك ان مدونتى اسمها على
اسم قصيدتك الجميلة ساتياجراها
واحب اعرفك كمان ان بنتى قابلتك مرة قى نقابة الصحفيين وحضرتك لطعتها بوسة من يومها محدش عارف يكلمها(عقبالى) ربنا يخليك لنا ويبارك لنا فيك

ابو النجوم said...

انت مش ناوى ترد على التعليقات ولا اية ياعم احمد ولا الحكاية تقل ماشى ياواد ياتقيل
ورحمة امى لابلغ عنك وتطلع من القهوة ومعاك الربعاية ونبقى نشوف هتعبرنا وترد ولا اية
ابو النجوم

احساس لسه حى said...

عزيزى
اللى تجمعم الاوطان
عمر ما الاديان تفرقهم
واللى الاديان تجمعم عمر ما الاوطان تفرقهم برضوا
المهم يتجمعوا على مبدئ وهدف
والوطن زى ما هو غالى
الدين برضوا غالى
وعمر الدين ما يكون ضد الوطن ولا الوطن ضد الدين
لان كل دين مهما كان بيدعوا للحريه والعدل والرحمه
سلام

محمد المقهور said...

عم أحمد
صباح المجد والعزة
صباح الشعر والإخلاص
صباح العبقرية اللي
اكتفت باسمك ... وبس خلاص

صباحك ورد شامي ونور
وصدق الكلمة والإحساس
بأشعارك كتبت سطور
حتفضل في صدور الناس
وحبك باقي في صدورنا
من البحرين ....... إلى مكناس

سيدي وسيد راسي وحبيب قلب قلبي ونور عينيّ الاتنين عم أحمد
أنا عربي سوري أعمل في السعودية من 25 سنة ولغاية الساعة دي لا عندي ريال ولا دولار ولا شقة وعندي 54 سنة وولد خد الثانوية الأسبوع ده بتقدي ممتاز 90% وما عنديش فلوس أصرف علىإكمال تعليمو وأنا وأم عيالي عيانيين وقدرتنا على الحركة محدودة جدنا
أنا ما بشتكيش
أنا بس عايز أقول لك إني وأنا في وضعي ده فرحت لما سفت مدونتك أكثر من فرحي بمليون دولار كاش تحل كل مشاكل دنيتي وآخرتي برضه

وأنا من حوالي خمس سنوات كتبت فيك قصيدة بلهجتك الحلوة
وحدور عليها وأكيد وبإذن الله حلاقيها وأكتبهالك هنا
ربنا يطول عمرك ويديك الصحة ويحفظك من كل شر
قول آمين
إحنا كلنا منحبك


المخلص: محمد المقهور

جايز تسأل يا عم أحمد ده حب فعلا ولا انبهار مؤقت ولا نفاق
وأنا بقول لحضرتك إن ده حب صافي
والحب الصافي هو جايزة الناس الغلابى لكل صادق

ناردين said...

وحشتنا

Anonymous said...

انا صحيح ماعشتش الأيام اللى بشوفها ف أفلام الأبيض واسود بتاعت المسلم يخبط على المسيحى جاره يديله كحك و الحوار ده و مشفتش الكلام ده بعينى بس معتقدش اننا بنكره بعض بس المشكلة مشكلة غباااااااااااااااااااااااء ربنا يزيح الغبا عن دماغنا..

متشكرين يا حاج أحمد و ربنا يخليلنا حسك ف الدنيا

elbostagy2 said...

السلام عليكم ورحمة الله وبركاته

الإخوه الكرام
طبتم وطاب ممشاكم وتبوأتم من الجنة منزلا

ياريت نشارك في الحمله دي

غزة لن تجوع ولن تركع

وجزاكم الله خيرا

محمد حمدي said...

كنت منور عند الكتعه بتاعه السمك فى أسكندريه أمبارح يا عم أحمد

بالهنا والشفا يا أحلى دماغ فى مصر

Adams said...

أهلا بالفاجومي؛ ارجو ان تزور مدونتي فيها قصيدة أكيد ستذكرك بالكثير
تحياتي

Anonymous said...

ازاى بس يا عمنا منعرفكش ده انت لو عملت ايه انت حبيبنا والله حبيبنا ونفسي اشوفك قبل ما اموت يا عمنا بس مش عارف اوصللك بس بأزن الله هنحت في الصخر لحد ما اجى وازورك واتشرف برؤيتك ويلعن ابو مبارك علي ابو السادات ويرحم ناصر العظيم ويطول في عمرك يا فاجومى يا عظيم


نور التميمي

shofolofo said...

طب يا حاج احمد .. انا أقبل ان واحد زيك يتكلم .. عشان انا عارف انك فعلا بتحب مصر ..


انما ناس اجانب او واحد زي ايمن نور او بعض الناس من الاخوان او كفاية او او .. تلاقيهم اكبر ****** في البلد و بياكلوا في اتة محلولة و تلاقيهم خدتهم العزة بالاثم لما حد يقولهم ان الوطني احسن منكم .. طب متحكمنا انت و كلنا حننتخبك

Unknown said...

المصيبه ان كل واحد عامل نفسة مش فاهم حاجة تنقط .....تعالي انا و انت نعمل نيولوك ...انت وائل كفوري و انا هيفاء ...بحبك يا نجم النجوم يا فجوم

soha zaky said...

أه يا فارس احلامى ، ايه الجمال دا يا عم نجم ، انت ارجل راجل موجود فى الدنيا اللى احنا فيها دلوقتى دى واللى يزعل يشرب من اسمه ايه دا ... مش عارفه ، اهو يزعل وخلاص بحبك اوى اوى اوى

أميرة said...

الله الله

بجد انا فرحانة اوى ياعم احمد انك بتدون وشرفتنا ودخلت معانا عالم التدوين .. رغم انك دايما قريب مننا من يوم ماوعينا على الدنيا وعرفناك واحنا بنحبك وبنحب كلامك العبقرى وانا فرحانة اكتر انى اتلقيت فى مدونتك الجميلة ربنا مايحرمنا من ابداعك

Anonymous said...

ايه الجمال ده ياعم احمد والله اول مره اعرف انك عملت مدونه ومتتصورش اد ايه انا سعيد جدا وهكون مواظب علي متابعه اخر تدويناتك

Anonymous said...

سمعنا إنك بعت حقوق كتابك الفاجومي

( اللي يحكي قصة حياتك )

لأكثر من منتج

إيه الحكاية بالظبط

أشرف حمدي said...

حبيب قلبي الشاعر العظيم أحمد فؤاد نجم
انا مش مصدق انك عملت مدونة .. بجد خطوة عظيمة أحييك عليها
انا من أشد المعجبين بيك
تحياتي لك يا فنان

أشرف حمدي
رسام كاريكاتير

Sakalans said...

لازم تسالني الاول قبل النيولوك حاوديك عند الراجل اللي بيعمل نيولوك لهيفاء..... يمكن ساعتها نقدر نبقي زي لبنان طدة في كل حاجة ولا ايه.... و بعدين انت قاعد فين في الاسكندرية ؟؟؟

حزيــــــــــــــــــن said...

حد عارف تعمل ايه حد عارف تبقى مين
هما حبة ملعونين واحنا احنا فلاحين
لو تنسطل راح نعرفك او تنقهر راح نكشفك
لكن اكيد لو تتختفى
او تتورب
او ترتعش او تنزرب
هنقول دا مين
ونجم فين
هما هبة ملعونين
واحنا احنا الفلاحين

Anonymous said...

يا أبو النجوم .. يا فاجومي
قول .. سمعني ..
عاوز أغسل معاك همومي ..
إحكي عن كل السنين ..
عن السجن .. و السجانين ..
عن الضحايا .. المطحونين ..
عن الشقايا .. التعبانين
اللي عاشوا يجمعوا .. مهر العروسة ..
الطيبة .. المذهلة .. المحروسة
و إنتهى عمرهم .. متشوقين ..
من غير زفاف .. و لا كوشة
و لسه ياما .. متيمين
بس يا خسارة .. على دي حوسة
هو فيه فرح .. من غير عروسة؟!

Unknown said...

بمناسبة احتفالات ثورة يوليو أنا عاوز المصريين يفتكروا قائدها اللواء محمد نجيب فلو عايز (ة ) تشارك (ى) فيها أنا حاطط على المدونة بتاعتى كود لصورة نجيب ممكن تحطيها فى
add page element html/java code
وده لحد يوم 23 يوليو مع انى عارف ان ده مش هيعوضه هو ولا أسرته عن اللى اتعمل فيهم بس يمكن تنجح المحاولة ويزور قبره رئيس الجمهورية ويقراله الفاتحة أو يكتبوا فى كتب التاريخ اللى مزورينها انه كان أول رئيس لمصر
شكرا

مصطفى محمود said...

لا والنبى يعم نجكم بلا اى نيو لوك ..احنا بنحبك كدة بجلابيتك وتسريحة شعرك . بص احنا زعلانيين منك علشان متاخر علينا بقصايدك الحلوة يا ابو النجوم ...مفيش اى موضوع كدة ولا كدة حابب تتكلم عنة .

مع تمنياتى القلبية بالابتعاد عن عيون امن الدولة .


سلام

Anonymous said...

أولآ : أنا مش مصدقة نفسى أنك أكتشفت مدونتك يا أجمد و أجرئ شعراء مصر و الوطن العربى

ثانيآ : أحب أهنيك على المدونة بتاعتك لأنها جامد موووووووووت

ثالثآ : أنا رأيى فى الموضوع ده ان مش ينفع أننا نتعالم مع بعض و أحنا كرهين بعض مسلم أو مسيحى أو يهودى ف كلنا انسان و سيدنا محمد عليه الصلاة و أفضل السلام أحنا و صانا بالمعاملة الطيبة مع المسيحين أو أى دين أخر ( لكم دينكم و لى دين ) يبقى أحنا لازم نعمل بتعاليم ديننا و نتعامل معاهم عادى جدآ زى أى أصدقاء لنا مسلمين

و هما كمان لازم يتعاملوا معنا كويس

أنا عن نفسى بتعامل مع مسيحين و مش بشغل دماغى بنقطة أختلاف الدين و بنساها أصلآ


و بجد جميلة ساحة الحوار دى

Anonymous said...

الحقنا يا فاجومي

الحقوا يا مدونين مصر

هيقطعوا عنكم النت عشان ماعادوش قادرين عليكم

القرار الأخير بتاع وزير الاتصالات بتدمير الشبكة المصرية الهشة أساسا و حرماننا جميعا من الاتصال الدائم و المفتوح بالإنترنت لازم نقف قصاده و بشدة

لازم كلنا نبقى ايد واحدة

فيه حملة قومية لتقويض القرار ده... كلنا لازم نشارك... و اللي عاوز معلومات أكتر يراجع مدونتي، و اللي مكسل هيندم طول عمره

كفاية سلبية بقى.. كله إلا دي

عـسـل مـرمـر said...

الدين عامل زى اللغه كل واحد بيتكلمها بطريقته و حتى اصحاب اللغة الواحده عندهم تعدد ف اللهجات و حتى اصحاب اللهجة الواحده كل واحد بيتناولها بطريقته و اسلوبه
و مذهبه
عشان كده بلاش تعمل نيو لوك انت كده حلو
:)
الغريب و المدهش اننا كشعب اسكندرانى مصرى جمعاء عمرنا ما خدنا بالنا من ان فلان مسيحى أو مسلم .. ولا فلان من بحرى ولا كبرى الناموس
يبأه مين اللى بيعمل مشاكل ؟

عـسـل مـرمـر said...

و الله شكلك انت اللى بتطلق الإشاعات دى
:))))))

Dr. Eyad Harfoush said...

مساء الخير يا عمنا أبو النجوم
المشكلة اتغرست ايام "البتاع" الله يجحم روحه و مازالت بتكبر زي الزرع الشيطاني كل يوم، من يوم ما قتلنا الانتماء الوطني و القومي اللي كان بيوحدنا تحت راية واحدة، ماعدش فاضل للشباب غير الانتماء للدين ، خدها رجال الدين فرصة لزيادة الثروات و الظهور في الفضائيات، و رضعونا و احنا كبار و شربونا البول أنهار ، و كمان رجال الدين المسيحي خلصت قصص شهداؤهم و فضيوا يعملوا مسرحية عن المسلمين

المشكلة يا عمنا الكبير اننا بفضل البتاع اتسلخنا عن بعض، فبقى فيه نادي مسيحي و نادي اسلامي، مدرسة بصليب و مدرسة بهلال، مستشفى شافعي و مستشفى قبطي، ده حتى المايوهات بقى فيها اسلامي و غير اسلامي

يا عمنا، بدل النيولوك عندي فكرة، أن تعلن من فوق جبل المقطم نداك للشباب المسلم و المسيحي العاقل انهم ينضموا في جمعية رسمية لمحاربة تمزيق مصر، لانك رمز يحسن الطرفين الظن بيه اكيد الاتنين هايستجيب منهم عناصر جيدة، و انا العبد الفقير هاكون اول مستجيب يدعم الفكرة بالوقت و الجهد و المال

مسلم بيحب مصر اقباط و مسلمين و من غير

عمر أفندى و أبووه said...

ربنا يهدى الجميع يا عم نجم

انا اول مرة اخش مدونتك بعد ما شوفتك لقاءك الجميل مع منى الشاذلى

سكوت هنصوت said...

عمنا الكبير
عذرا للمقاطعة
نحتاج الى رأيك ودعمك في حملة القضاء على المخدرات انتظرك هناك
www.tw3ya.blogspot.com

Anonymous said...

عمنا اسمع كلامى ومتعملش نيولوك
لان مصر فى الدم
مش فى الخلق

وعلى راى اللى قال ....كل شعرئنا العظام ....اشكلهم ملخبطه


والخلقه خلقه ربنا وهنعمل ايه

اسمع دى

ديوك رومى على بلادى
علا بلادى ديوك رومى
ديوك تحكم ...وتتحكم
فى ديك بلادى ..عشان رومى
ديوكهم عرفها سايد
بتحكم فينا وت زايد
عشان عايشه ( صحيح )يومها
وانا شايل ( حطام )يومى
ديوك رومى

مواطن زهقان said...

احمد يانجم يافذ اللسان بقولها بصراحه ويشهد زمان بحبك لانى بحب الحقيقة وصوتك فى ودنى يهز الكيان احمد فؤاد يانجم الغلابة يارمز العناد يانبع الطيابة ياروح التحدى ومعنى الصمود تلم الاحبة ولو وسط غابة وحياة ابويا بحب ابن ابوك ولو خيرونى لاصبح اخوك ويسقينى شعرك ويكتر كلامك واسعد لانى عيونى شافوك احمد يانجم يانجم الغلابة احمد فؤاد يافذ اللسان

Anonymous said...

بص ياعم انت كدة عداك العيب وازح

بتاع العسل said...

اللهم ارحم امواتنا

محمود فهمى said...

تعرف يعنى طب ورينا

Ahmed Al-Sabbagh said...

يا قمر مصر الكبير المنور
يا ورد مصر الجميل المزهر
يا لمحة من زمن حلو فى زمان أغبر

ياعمى وعم عيالى اللى لسه فى الغيب
وانا لسه مستنظر

ياعم نجم ياللى ساكن فى روحى وكيانى

ياعم نجم
ياللى حروفك بتنسينى احزانى

ياعم نجم
ياللى اشعارك بلاقيها كل مرة
فى الضلمة مستنيانى

يا عم نجم
ياللى لما بشوفك بتتكلم وتحكى
برجع احب مصر تانى

أبنك أحمد الصباغ
http://ahmedelsabbagh.blogspot.com/

max.adams said...

يا سلام البيتين طالعين في وقتهم صح مافيش بعد كده حق الناس اللي ناقصة عقل دي تصلح تصرفاتها . وبلاش النيولوك أنا حابب الفاجومي كده ملك زمانه

Anonymous said...

عم احمد ياحبيبي والله حبيبي الله يرحم الكلمه الحلوه ويرحم الي كتبوها ويخليك لينا يا فاجومي

tarek momen said...

بص ياعمنا عيسي نبي موسي نبي محمد نبي وكل من له نبي يصلي عليه تعمل نيو لوك تعمل اولد لوك احنا هارشينك من كلامك ومابنتهددش

CheToS said...

ربنا يحفظ مصر وأهل مصر وأهلها إن شاء الله فى رباط إلى يوم الدين...وذنبهم على جنبهم لو ما أخدوش الكلام دا اعملهم نيو لوك جديد ووريهم هههه

Anonymous said...

طول عمرك عظيم يا نجم
ناجح يوسف فهمى
شاعر وناظر مدرسة اعدادية
مدونةalabalatta.blogspot
ويا ريت اعرف رأيك فى كتاباتى

فرحة said...

وآدى كمان يا أبو النجوم اللى قاله أحمد شوقى زمان

الدين للديان جل جلاله
لو شاء ربك وحد الأقواما
هذى ربوعكم وتلك ربوعنا
متقابلين نعالج الأياما
هذى قبوركم وتلك قبورنا
متجاورين جماحما وعظاما
فبحرمة الموتى وواجب حقهم
عيشوا كما يقضى الجوار كراما

dina said...

انا اول مرة اعرف ان عم احمد الجميل اللى انا بعشقه و متربية على كلامه معانا هنا.....زو الموضوع المرة دى يخصنى اوى..اسكندرية...فعلا فى مشاكل كتيرة جدا عندنا فى احياء مختلفة و كل يوم تسمع عن مشكلة بين مسلم و ميسحى و هوب تقلب بسرعة تبقى مشكلة طائفية........حرام اجمل ما فى بلدنا وحدتنا و وقفتنا جنب بعض يروح بايدنا..و ادينا شايفيين اللى بيحصل فى العراق و لبنان

واحد وبيتكلم said...

تعالوا نعلي صوتنا واللي عاوز يقول يقول


http://kalamser.blogspot.com

محمد مصطفى said...

ياعم احمد ياحته من النخاع ...

ياللى ورتنا الطريق وعرفتنا البتاع

جُلنا دلوقت يقولوا ده العام انباع

والخاص شويه واليهود ياخدوه ..

ميمنعهمش منـاع ....

غاز وسكر دقيق وزيت ...

ابو العيال وست البيت ...

مكونات بسيطه ... وحكومتنا الحويطه

... شالت مصر .. من عالخريطه ...

احنا نرضى بس فين ...

كنا فين وبقينا فين ...

تفوت سنين وتيجى السنين ....

وندعى
نقول يارب آمين ....

يارب غيرك ملناش ...

حكمانا ناس متسواش ...

ومهما قالوا عليك حشاش ....

هتفضل فى قلبى وطز فى البتاع

... ياعم احمد ياحته من النخاع

Anonymous said...

اين الشاعر الكبير الان

همسه said...

!!! مسيحى
!!! مسلم

كلنا لادم وحواء
وكلنا روح وانسان
كلنا اقباط
ولاد اقباط
اقباط مسيحيين
واقباط مسلمين
وصدق رسولنا الكريم
قال صلى الله عليه وسلم
اذا دخلتم مصر فاستوصوا باقباطها خيرا فان لكم فيها نسبا وصهرا


كلنا اخوات
من ام واحده
مصر
ام الدنيا
بس يا خساره
ام الدنيا
ومش عارفه تحضن ولادها
يا بيتخانقوا
يا بيطفشوا ويسيبوها
بعنى باختصار كده
اولاد
ام الدنيا
ايتام
عموما يا
عم نجم

ياريت تسك على النيو لوك

يا اااااااااااااااااااااه
ده انت
اجمل نيولوك
لقلب مصر

كل الحب ليك
و
تحياتى

Zawag alnaddy زواج النادى said...

السلام عليكم ورحمة الله وبركاته جزاكم الله خيرا على هذا الموضوع الجميل ** بجد موضوع جميل ومشوق... بارك الله فيكم يا شباب

Zawag alnaddy زواج النادى said...

السلام عليكم ورحمة الله وبركاته جزاكم الله خيرا على هذا الموضوع الجميل ** بجد موضوع جميل ومشوق... بارك الله فيكم يا شباب

Anonymous said...

الله يجزاكم خير أبغى ولدي يشارك في المسابقة لكن مش عارفين كيف .. والاستبانه مش عارفين كيف نحصل عليها ؟ ما في أحد يرد علينا وليس لأحد علم بالمسابقة سواء في حلقة التحفيظ أو المدرسة .. أفيدوني رجااااااااء 

Unknown said...


thank you

سعودي اوتو

Unknown said...


thank you

سعودي اوتو